Sabarimala temple bulah buaina chhuak Media miten hliam an tuar

Supreme Court-in Kerala-a Lord Ayyappa temple, Sabarimala Temple-a hmeichhia, kum 10-50 inkar luh a phalsak hnuah November thla atan Thawhṭanni aṭang khan temple hi hawn a ni a, hmeichhia luh duh lotu ten temple complex-ah nawrh huaihawtin buaina a chhuak a, media mi ṭhenkhatten hliam an tuar.

Temple hawn a nih dawn vang hian police pawh tam tham tak duty tir an ni a, hetichung hian Lord Ayyappa zuitu mi tam tak chuan hmeichhe luh remti loin temple bulah hian nawrh an huaihawt a ni. Kerala High Court chuan Supreme Court thupek lo tihchhuah tawh angin temple-ah chuan tupawh luh phalsak turin a ti a, mahse Lord Ayyappa zuitute chuan kum tam tak an lo kalpui tawh, temple-a hmeichhia kum 10-50 luh khapna chu hman chhunzawm zel an duh a ni.

September 28 khan Supreme Court chuan hmeichhia tupawh temple-a luh phalsakna thupek tichhuak mah se, hmeichhe kum 10-50 inkar chu tun thlengin temple-ah hian kal an la lut chuang lo.