Delhi boruak chhiat belh zel

Delhi khawpui boruak chu a chhiat belh zel a, Thawhṭanni khan tun season chhunga boruak a bawlhhlawh ber ṭum niin pollution level hian 'severe plus emergency' category a thleng tawh.

Thil tleh kawng inthlak vang leh a ṭhenawm state-a thlai ro hal khuin a bawh chhunzawm reng avangin Delhi boruak hi a chhiat belh zel a ni. Central Pollution Control Board (CPCB) data-a a lan danin Thawhṭanni khan PM 2.5 (particles in the air with a diameter of less than 2.5 micrometres) leh PM 10 concentration hian 365 leh 503 a thleng. PM 2.5 level-a 300 chuang leh PM 10 level-a 430 chin hi 'severe-plus emergency' category-ah dah an ni.

NCR, Faridabad, Ghaziabad, Noida leh Greater Noida-ah chuan pollution level hi 'sever' level thlengin, Gurgaon-ah chuan 'very poor' level a ni.

Official-te chuan khawpui boruak chhiat belh zel chhan hi thli tleh dan kawng inthlak vang a ni tih an sawi a, hmarthlang lam bial aṭangin Delhi lamah thli a tleh avangin an ṭhenawm state-a thlai ro hal khu nasa tak chu Delhi lamah hian a len lut a ni.

System of Air Quality Forecasting and Research official chuan air quality hi darkar 48 chhung 'severe caterogy' a nih chhunzawm chuan boruak bawlhhawlh belh zel tur venna dan hman belh an tum dawn tih a sawi.

Delhi sorkarin boruak bawh-hlawh belh zel tur venna tura khuahkhirhna te siam mah se pollution level hi a la san belh zel a ni. Sorkar chuan November 1 aṭang khan ni 10 chhung atan 'Clean Air Campaign; a kalpui a, hemi chhung hian in sak hna thawh mekte pawh tihtawp tir vek niin, bawlhhlawh khu siam thei stone crusher leh bot mix plants te pawh khar tir an ni bawk.

Delhi Pollution Control Committee chuan transport department leh traffic police-te hnenah khu tichhuak nasa motor-te dap chhuak tura nasa zawka beihpui thlak turin a ti bawk. Union Environment Minister Harsh Vardhan chuan pollution control norms palzutte chungah zahngaihna lantir a ni lo ang, a ti.