Mufti-i'n Amit Shah thusawi chhang let

Jammu and Kashmir chief minister hlui Mehbooba Mufti chuan union home minister Amit Shah-a'n J&K-a eptu pawlin ṭangrual pawl an din chungchanga a thusawi a chhang let. 

BJP hruaitu, Amit Shah chuan J&K-a eptu ṭangrual pawl, People's Alliance of Gupkar Declaration (PAGD) chuan J&K chu hun khirh leh hrehawm taka  hruai let leh an duh a, Article 370 an ṭhiah avanga Dalit, hmeichhie leh tribal-te dikna chanvo dik tak pek let an ni chu lakbo sak an duh a ni, tiin a sawi. Hei vang hian mipuite pawhin he ṭangrual pawl hi an hnawl a ni, a ti. 

Shah chuan ṭangrual pawl, Gupta Gang chuan J&K buainaah ramdang sipaite inrawlh tir an duh a ni tiin, India hnam puanzar an hmusit a ni, a ti. J&K chu India ram peng pawimawh tak a ni reng dawn a, India mipuite chuan hnam inpumkhatna tichhe zawnga thiltih chu an enliam mai mai dawn lo tiin a sawi. 

Amit Shah thusawi hi CM hlui Mufti chuan chhang let nghalin, "Inthlan chuh tura ṭangrual pawl din chu anti-national ah a chang ta a ni. Hetih lai hian BJP chuan thuneihna chan a chak luat avangin tupawh a remchang apiang a thawhpui a ni. Mahse ṭangrual pawl kan din chuan ram pumkhatna dah pawimawh loha puh kan ni leh thung a ni," a ti. BJP chuan an tihdan phung an sim thei lo tih sawiin, an khingpuite apiang anti-national-ah an puh zel a, hetih lai hian BJP chuan India ram danpui chu nasa takin a palzut reng thung a ni, a ti. 

BJP-in an tactic hman ṭhin, India ram chhanhim leh humhimtua insawi a, an khingpuite apiang ram hmelma anga lantir an tum ṭhinna chu hriat chian a ni tawh a ni, tiin Mufti chuan a sawi. 

J&K-a ṭangrual pawl din thar, People's Alliance for Gupkar Declaration (PAGD) hi chief minister hlui Farooq Abdullah-a'n a kaihruai a, he pawlah hian National Conference, Peoples Democratic Party, CPI-M, Jammu and Kashmir People's Conference leh Awami National Conference-te an tel. Congress party chuan District Development Council (DDC) inthlan lo awm turah PAGD hi an thawhpui tur thu a sawi tawh bawk.