PM-i'n a ṭum 5-na atan Ukraine chungchangah high-level meeting ko

Prime minister Narendra Modi chuan nimin khan Ukraine rama Indian tangkhang mek, a bikin zirlaite hruai hna kalpui mekte thlirin meeting a ko leh a, hei hi Ukraine chungchanga high level meeting a koh ṭum ngana a ni.

Meeting hi minister of commerce & industry Piyush Goyal, foreign secretary Harsh Vardhan Shringla, National Security Advisor (NSA) Ajit Doval leh senior official te'n an hmanpui.

Russia sipaiten Ukraine an beih mek karah, sorkar laipui chuan Operation Ganga tih hmanga Ukraine rama India mi awmte hruai haw hna a kalpui mek a ni.

PM Modi hian Ningania Quad leader-ten virtual meeting an neihah, Ukraine buaina chingfel tura inbiakna hmanga hma lak a ṭul thute a sawi a, UN Charter, international law zawm leh ram thuneihna inzahtawn a pawimawh thute a sawi bawk.

Sorkar laipui chuan India mi tangkhang mekte hruai haw hna ngawrh taka kalpui zel a nih tur thu sawiin, Ukraine ṭhenawm rama India mi hruai chhuah hna kalpui dan enpui turin union minister palite chu 'special envoy' atan ruatin a tir chhuak a ni.

Kyiv chhuahsan tum Indian zirlai kah a ni : Union Minister
Ukraine khawpui Kyiv chhuahsan tuma tlanchhia Indian zirlai pakhat chu kah a nih thu union minister VK Singh chuan Ningani khan a sawi. Hemi hma hian Kharkiv-a Russia sipaite'n bomb an thlak avangin India mi zirlai pakhat chu a lo thi tawh bawk a ni.

Minister chuan Kyiv khawpui chhuahsan a tum laiin Indian zirlai hi silaia kah a nih thu leh,Kyiv-ah hruai kir lehin khawpuia damdawi-inah enkawl mek a nih thu a sawi. Thawhlehni khan Ukraine-a khawpui lian ber dawttu Kharkiv-ah Indian zirlai, Karnataka mi, kum 21-a upa Naveen Shekharappa chu eichawp dawr kawta ei tur lei tura a intlar chu Russia sipaite bomb thlakah a thi.

Sorkar laipuiin zirlai tam thei ang ber dam taka an rawn let leh theihnan theihtawp a chhuah thu Minister chuan a sawi a, zirlai 1,700 vel bawr vel hruai chhuah hmabak an la awm tih a sawi. Special envoy atana Ukraine ram ṭhenawma an tirh zinga mi, General Singh chuan, "Indian Embassy chuan mipuite chu Kyiv chhuahsan turin thupek a lo chhuah tawh a. Indonaah hi chuan silai mu hian kan sakhua leh hnam a thliar hrang lo a ni," a ti.

Indian zirlai tam tak chuan Ukraine chhuahsan tumin ramri lam an pan a, Ukraine ṭhenawm ram aṭangte hian "Operation Ganga" kaltlangin thlawhtheihna hmangin India ramah hruai haw leh an ni.

Ministry of External Affairs tarlan danin, khawpui chhuahsan tura thupek an siam hnuah Indian 17,000 dawn te chuan Ukraine ramri an chhuahsan tawh a, mi 6,000 te chu India-ah hruai haw an ni. Indona a chhuah hma hian Ukraine-ah hian Indian 20,000 bawr vel awmin, heng zinga a tam zawk chu medical zirlaite an ni.