Kumina Covid-19 vanga thi zinga 92%-in vaccine la lo : Health Ministry

India-a kumina Covid-19 hri vanga thi zinga 92% te chuan vaccine an la lo tih Union Health Ministry chuan a sawi.

Ministry chuan hri kai tlahniam zel vanga school, college-te hawng chhoin, eibar zawnna leh nitin khawsakna kawnga nunphung pangngai kan zawh chhoh mek karah fimkhur taka inveng zel turin mipuite a chah.

Health ministry official-te chuan tleirawl kum 15-18 inkar zinga 74% te chuan vaccine dose khatna an lak tawh bakah 39% ten dose hnihna an la tawh bawk tih an sawi. India ramah chak leh darhzau taka vaccine an semchhuah avangin Covid kaihhnawih vanga thi pawh an tlakhniam phah a ni, an ti.

Covid-19 vaccine dose khatna chuan 98.9% in thihna lakah min veng thei a, dose hnihna lak phei chuan thihna lakah hian 99.3%-in min veng thei tih official-te chuan an sawi.

Healthcare, frontline worker-te hmalakna leh vaccine semchhuah ṭhat chuan Covid hri leng darh tur chu nasa takin a vengtih NITI Aayog Member (Health) V K Paul chuan sawiin, "Vaccine vanga coronavirus leng tlakhniam hun kan tawng mek a ni. School, college, resort, eibar zawnna hawn leh nunphung pangngaia khawsak chu thil tihawm a ni tawh. Tunah hian, ramchhunga district 29-te chuan Covid-19 positivity rate 10% chunglam an nei a, district 34 te chuan 5-10% an nei mek tih official chuan a sawi. Sorkar leh mipuite ṭanrualna zarah ramdanga hri leng rapthlak tak ang kha India ramah chuan kan hmu ve lo a ni," a ti.