MP-ah bawng cabinet siam dawn

Madhya Pradesh chief minister Shivraj Singh Chouhan chuan nimin khan an state sorkarah bawng cabinet (cow cabinet) siam a nih tur thu a sawi.

Bawng cabinet hi siam tum a nih chhan chu an state chhunga bawngte humhalh a nih theih nan leh bawng vulh an tam theih nana tih a nih thu a sawi.  Bawng cabinet-ah hian Animal husbandry, Forest, Panchayat, Rural Development leh Home and Farmer Welfare department-te chu an tel dawn niin CM Chouhan chuan a sawi bawk a ni.

Ruahman lawk dan chuan Novem­ber 11 hian Gopashtami-a Gau Sanctuary-ah bawng cabinet meeting hmasa ber neih a ni dawn tih CM chuan a sawi bawk. Cabinet siam thar hnena thuneihna leh mawhphurhna pek dan tur hi CM chuan a la sawichiang lo. 

Home minister Narottam Mishra chuan an state chuan 'love jihad' (muslim mipaten sakhaw dang betu hmeichhiate ngaizawng a, muslim sakhuaa an inlet tir ṭhin ) khapna dan pawh siam tum a ni tih alo sawi tawh bawk. 

MP-ah chuan 'love jihad' hnuaia  bail theih lohin thubuai siamsak theih an ni dawn a, thiam loh changte chu kum nga thleng lungin tantir theih an ni ang, a ti.