PM Modi-a'n Chhatrapati Shivaji Maharaj-a lim hawng

Prime minister Narendra Modi chuan nimin khan Pune Municipal Corporation compound-a gunmetal kg 1,850 hmanga siam, feet 9.5 a sang Chhatrapati Shivaji Maharaj-a lim khuh hawnna a nei.

Milim hawnna inkhawm buatsaihah hian Maharashtra governor Bhagat Singh Koshiyari, deputy chief minister Ajit Pawar, Maharashtra assembly leader of opposition Devendra Fadnavis leh Pune mayor Murlidhar Mohol-ten an telpui a ni.

PM Modi hian milim a hawn hnu hian Pune metro rail project, km 32.2-a thui kawng siamna tur chu a hawng nghal bawk. Prime Ministers Office (PMO) chuan he project atan hian Rs vbc 11,400 chuang ruahman a nih thu leh, Pune khawpui world-class infrastructure neihna tura ruahmanna a nih thu a sawi.

Modi hi Anandnagar Metro Station aṭangin tleirawl rualte nen metro-ah an chuang ho bawk a, he project lungphum hi December 24, 2016 khan PM Modi chuan a lo phum tawh a ni.

PM hian hmasawn hna thawhna tur project lungphum dangte pawh a phum nghal bawk. Mula-Mutha River project tuaitharna leh bawlhhlawh thenfai hna thawhna tur lungphum a phum bawk a, lui thenfai hna hi km 9-a thuiah neih tur niin, Rs vbc 1,080 chuang seng tura ruahman a ni.

Mula-Mutha River pollution abatement project hi “One City One Operator” hnuaiah Rs vbc 1,470 chuang senga sak tura ruahman a ni. He project hnuaiah hian sewage treatment plant 11 sak tura tih niin,a capacity hi 400 MLD a ni.

Prime Minister hian Baner-a e-bus depot sak leh e-bus 140-te a hawng a, Pune-a Balewadi hmuna RK Laxman Art Gallery-Museum a hawng nghal bawk. He museum hi Malgudi khaw entawna siam niin, audio-visual effect hmanga lantir a ni. Cartoonist RK Laxman-a lemziah pawh museum-ah hian pholan a nih tur thu PMO chuan a sawi.