Covid vaccine dose vbc 178.80 chuang semchhuak tawh
Union Health Ministry chuan Inrinni liam ta thleng khan ram chhungah Covid-19 vaccine dose vaibelchhe 178.83 chuang pek chhuah a ni tawh tih a sawi. Inrinni bik khan zan dar 7 thlengin vaccine dose nuai 23 chuang pek a ni.
Precaution dose chu a la thei tura bithliah - healthcare worker, frontline worker leh kum 60 chunglam natna benvawn nei zingah mi vaibelchhe 2.06 chuangin an la tawh bawk.
Phase 3-na aṭanga vaccine pek ṭan, kum 18-44 inkar zingah Covid-19 vaccine dose khatna la 55,25,28,971 awm tawhin, mi 44,93,76,379 in dose hnihna an la tawh bawk a ni.
Tleirawl kum 15-18 inkar zingah vaccine dose khatna la 5,53,65,272 leh dose hnihna la 3,07,53,607 an awm tawh tih ministry chuan a tarlang.
Covid-19 vaccine hi kum 2021, January 16 khan ram pumah pek chhuah ṭan a ni a, healthware worker-te chu a thawh khatnaah hian pek a ni. February 2, 2021 aṭangin frontline worker-te pek ṭan an ni bawk. Hemi kum vek March 1 aṭangin kum 60 chunglam leh, kum 45 chunglam natna benvawn neite hnenah vaccine hi pek ṭan a ni a, April 1-ah ram pumah kum 45 chunglamte hnenah vaccine hi pek ve leh a ni.
Kum 2021, May 1 aṭangin kum 18 chunglamte hnenah Covid-19 vaccine pek chhuah ṭan a ni ve leh a, kumin January 3 aṭang khan tleirawl, kum 15-18 inkarte pek an ni ve leh bawk.
Omicron variant vanga India rama hri a darh chak leh tak viau hnuah healthcare worker, frontline worker, inthlana duty tura chhuakte bakah kum 60 chin chunglam natna benvawn neite tan Covid-19 precaution dose hi January 10 aṭangin semchhuak leh a ni.
Hri kai thar 5,476 awm belh
Inrinni liam ta khan ram chhunga Covid-19 hri kai thar 5,476 awm belh lehin, hemi ni hian hri vanga thi mi 158 an awm leh bawk.
Hri lengin ziaawm lam pan zelin, hri kai mek, active case hi 5,15,036-ah a tlahniam tawh a ni. Hri kai hmuhchhuah tawh aṭangin hri kai mek hi 0.60% an ni.
Ram pumah Covid-19 kai hmuh chhuah hi 4,29,62,953 awm tawhin, heng zinga 4,23,88,475 chu an dam leh tawh a ni. Hri thihpui hi 5,15,036 an awm tawh bawk.