Indian Navy-in hlawhtling takin BrahMos missile enchhin

Indian Navy chuan kar liam ta Inrinni khan BrahMos cruise missile long-range version thar chu hlawhtling takin a enchhin.

Navy chuan BrahMos missile-in long-range precision strike lama a ṭhat zia a nemnghet tih twitter kaltlangin a sawi. "BrahMos missile thuam ṭhat hi hlawhtling taka enchhin a ni a, Aatmanirbhar Bharat tan phurna nasa zawk min thlentu a ni," tiin Navy chuan an tarlang. Khawvela cruise missile hlauhawm ber zinga mi, Brahmos hi Navy hian an enchhin fo tawh a ni.

Nikum November thla khan India chuan Andaman and Nicobar Islands aṭangin BrahMos supersonic cruise missile land-attack version chu hlawhtling takin a lo enchhin tawh bawk.

Kum 2021, December thla khan supersonic fighter aircraft Sukhoi 30 MK-I aṭangin BrahMos missile air version enchhin a ni a, he enchhinna hi Odisha thliarkara Integrated Test Range, Chandipur aṭanga neih a ni. Hlawhtling taka enchhinna an neih avang hian mellung pawimawh tak rawn siamin, ramchhunga BrahMos missile air version ṭhahnem tak an siamchhuah phah thei a ni.