Diwali lawm vangin Delhi boruak chhe zual

Nilaini zan khan Diwali festival lawmin Delhi khawpuiah halpuah leh halmawite nasa taka hal a ni leh a, hei vang hian nimin zinga Delhi khawpui boruak chu chhe zualin mihring tana hlauhawm, 'hazardous' category a thleng.

Delhi khawpui boruak bawlhhlawh nasat avangin Supreme Court chuan Diwali lawmna puala halpuah leh halmawi hal theih chi leh, a hal theih hun bihthliah pawh a lo siam tawh a ni. Mahse SC hun bithliah piah lamah nasa taka hal zui a ni ta tho a ni.

Nimin zing khan Anand Vihar-a Air Quality Index (AQI) chu 999 niin, US Embassy leh Chanakyapur chhehvelah 459, Majoir Dhyan Chand National Stadium chhehvelah 999 niin, hengte hi hazardous category an kai pha a ni.

Nilaini zantir lam khan air quality hi 'very poor' category a ni tawh a, hetichung hian halpuah hal theih hun bithliah piah lamah pawh mipuite chuan an hal chhunzawm zel niin thuneitute chuan an sawi. Supreme Court chuan Diwali leh festival dangah halpuah leh halmawite hal theih hun hi zan dar 8 - 10 inkarah a bithliah a ni, hei bakah hian boruak bawlhhlawh nasa siam lo chi 'green cracker' chauh hal a remti bawk.

Delhi Fire Services (DFS) chuan Diwali lawm chhung hian zan dar 10 thlengin kangmei chhuak report 200 chuang an dawng niin a sawi. Bawana bialah zan dar 6:37 khan factory-ah kangmei nasa tak a chhuak a, kangṭhelhtu 18 tirh nghal niin an ṭhelh mit thei a, thi leh hliam an awm lo. Laxmi Nagar bialah pawh kangmei a chhuak bawk. Delhi khawthlang lam leh hmarthlang lam district aṭangin call an dawng tam ber tih an sawi.