Rs vbch 18 thamna thubuaia inhnamhnawih Reddy a bibo

Bengaluru police-te chuan mining baron leh BJP minister hlui Gali Janardhan Reddy, thamna thubuaia inhnamhnawiha puh chu a awmna chin hriat lohin a bibo mek tih an sawi.

Sumdawng aṭanga politician-a inlet, Karnataka-a mi thiltithei ber zinga mi, Jarndardhan Reddy hian eiruk thubuai eng emaw zat a nei mek a ni. Kum 49 mi hi kum thum chhung jail-ah dah a lo ni tawh a, kum 2015 atang khan bail-a chhuahtir a ni.

Karnataka-a BS Yeddyu-rappa kaihhruai BJP sorkar hnuaiah Janardhana Reddy hi minister a ni tawh a, Bengaluru Police hnuaia Central Crime Branch chuan cheng vaibelchhe 18 thamna inpek kaihhnawihnaah man tumin an zawng mek a ni.

Private enterprise, Ami-dent Group neitu Syed Ahmed Fareed chuan Reddy hi minister a nih laiin eiruk thubuai a neih mek lakah chhanchhuah tiamin hemi atan hian cheng vaibelchhe 18 pe turin a ti niin a sawi. Pawisa hi Reddy-a thawhpui hnai tak hnenah a pe tih a sawi bawk. Ambident Grpui hi investor-te buma puh niin, investor te sum cheng vaibelchhe 600 tihching-pensakah puhin thubuai siamsak a ni. Police ten Fareed-a thu an zawhfiahnaah, Janardhan Reddy nen hian Bengaluru-a private hotel-ah inhmuin Reddy hian ṭanpui a tiam tih a sawi.

Syed Ahmed Fareed chuan an firm hian Bengaluru-a sumdawng pakhat Ramesh Kothari hnenah cheng vaibelchhe 18 a pe a, ani hian tlereuh siamtute hnenah pein rangkachak kg 57 nen a thleng a, he rangkachak hi Reddy-a thawhpui hnai tak, Ali Khan hnenah pek a ni leh a ni, a ti. Ali Khan leh Janardhan Reddy te hi man tumin an zawng mek a ni.