Note Ban Anniversary : Congress-in kawngzawh huaihawt

Prime Minister Narendra Modi-an pawisa note lian pahnih, Rs 500 leh Rs 1,000 a tihthih champha vawi hnihna, nimin khan Congress party chuan lungawi lohna kawngzawh an huaihawt. West Bengal-a rorellai, Trinamool Congress Party (TMC) pawhin nimin kha 'Black Day'-ah an hmang bawk.

Congress hruaitute leh worker-te chuan pawisa note tihthihin India economy a tihchhiat dan leh, mipuite harsatna nasa tak a thlen duh lohna lantirin kawng an zawh a ni. Congress party thupuangtu Manish Tewari chuan Prime Minister chu Indian economy tihchhiaa a tihbuai avangin an party chuan thupha chawi tura an phut thu a sawi.

Congress chuan PM-in pawisa note tihthih a nihna chhan pathum a sawi - sum chheprelh tihtawpna tur, pawisa note lem tibona tur leh firfiakte hnenah sum pek ṭhin danna tur tia a sawite chu a engamah a hlawhtling lo niin a sawi. Pawisa tihthih chu PM Modi-a ṭhianṭha, sumdawng lian ṭhenkhat chauhin an ṭhatpui a ni tiin, pawisa note tihthih a nih ni chu India democracy leh economy tana ni lungchhiahthlak tak a ni, a ti.

Pawisa tihthih dodal nasa ber zinga mi, TMC hotu Mamata Banerjee-i chuan kum hnih kaltaa PM Modi-an pawisa a tihthih khan nasa takin a lo sawisel tawh a, hei hi tunah chuan economist, mipui nawlpui leh expert-te pawhin an pawmpui vek tawh tih a sawi. Sorkar chuan ram mipuite a bum a, he thiltitu hi mipuite chuan hremna an la pe ve dawn a ni, tiin a sawi.

Reserve Bank of India (RBI) chuan pawisa note tihthih bank-a kir, Rs vaibelchhe 15,31,073 a tihralnaa a sum sen chungchang zawhna chu a chhang lo. RBI chuan Right to Information (RTI) Act hmanga zawhna a chhannaah, sum sen zat hi hmuh tur a awm lo tih a sawi a, hei bakah hian Rs 500 leh Rs 1,000 eng zat chiah nge tihchhiat tih zawhna pawh a chhang lo bawk.