Maoist helpawl bomb tihpuahah mi panga thi

Chhattisgarh-a Dantewada district-ah nimin khan Maoist helhoin sipai chuanna motor beihnan improvised explosive device (IED) an tipuak a, mi panga thiin an zingah hian Central Industrial Security Force (CISF) mi pakhat a tel.

Dantewada Superintendent of Police Abhishek Pallava chuan bomb tihpuahna hi Dantewala-a Bacheli-a tlangramah a nih thu sawiin, sipaite hi bazar-ah an mamawh leia an kir lam beih an ni, a ti. Thi zingah bus driver, conductor leh cleaner te an tel. Sipai pahnihin hliam an tuar bawk.

State assembly inthlan hmasak, Chhattisgarh-ah hian vawiin hian election campaign nei turin Prime Minister Narendra Modi leh Congress president Rahul Gandhi te kal an tum. Gandhi hian ni hnih chhungin rally hmun ngaah thu a sawi dawn a, CM Raman Singh-a bial Rajnandangoan a tlawh bawk ang. PM hian Jagdalpur a tlawh dawn thung a ni.

Naxal helho hian tunhnaia Chhat-tisgarh-a pawikhawihna an thlen ṭum hnihna a ni. October 30 khan Nilawaya khuaah police pahnih leh Doordarshan camerman an lo kaphlum tawh bawk a ni.

Chhattisgarh assembly inthlan hi thawh hniha neih a ni dawn a, November 12 leh 20-ah vote thlak a ni ang. Naxal hluarna district pariat, assembly seat 18 awmnaah November 12 hian vote thlak a ni ang a, a dang seat 72-ah chuan November 20-ah inthlan hi neih a ni thung ang. Congress party chuan kum 2003 aṭanga thuneihna changtu, BJP sorkar paihthlak tumin ṭan an la hle. Inthlan result hi December 11-ah puan a ni ang.