PM Modi-a'n Ukraine leh Russia President-te a bia

Prime minister Narendra Modi chuan nimin khan Ukraine president Volodymyr Zelenskyy leh Russia president Vladimir Putin-te chu telephone-in a bia.

PM Modi hian Ukraine President Zelenskyy chu be hmasain, Sumy khawpuia India mi tangkhang mekte hruaichhuah an nih theihna tura pui turin a ngen.

Ukraine-a Sumy khawpuiah hian India mi zirlai 700 vel an la tangkhang mek a, pui tura India sorkar ngenna video-te thawn chhuakin, tui in tur an neih tawh loh thute pawh an sawi a ni.

PM Modi leh President Zelenskyy-te hi minute 35 chhung vel inbiain, Ukraine ram chhung dinhmunte an sawidun a ni. Modi chuan Russia leh Ukraine aiawhten inbiakna an nei chu lawmawm a tih thu a sawi a, Ukraine aṭanga India mite hruaichhuahna kawnga Ukraine sorkarin a puih avangin President Zelenskyy chu lawmthu a hrilh nghal bawk.

Ukraine President pawhin an inbiak thu hi a twitter-ah tarlangin, India-in Ukraine mipuite a thlawpna avanga a lawmthu a sawi a ni.

PM Modi hian Russia-in Ukraine a run hnua Ukraine President a biak ṭum hnihna a ni a, February 26 khan a lo be tawh bawk.

Nimin chawhnu lam khan PM Modi hian Russia president Vladimir Putin a be bawk a, Sumy khawpui aṭanga Indian mite him taka hruaichhuah an nih theih dan chungchang a sawipui leh bawk. Russia leh Ukraine ram aiawhten inremna zawnga inbiakna an neih mek bakah, President Putin chu Ukraine President Zelenskyy nen direct-a inbe turin PM Modi chuan a ngen bawk a ni.

Russia President nen hian minute 50 vel inbiain, Ukraine dinhmunte an sawidun a ni. President Putin pawhin Ukraine ram aṭanga India mite him taka hruaichhuah an nih theina tura a theih anga puih a lo tiam bawk. Heibakah Ukraine leh Russia team-ten inbiakna an neih dante pawh Modi hi a lo hrilh bawk.