Palestine-a India palai Mukul Arya a thi

Palestine-a India palai, Muluk Arya chu Pathianni khan Ramallah khawpuiah a thi tih external affairs minister S Jaishankar chuan a sawi.

Jaishankar chuan a twitter-ah Arya thih thu hi sawiin, officer fing leh talent nei ṭha, hmabak eng tak neih a nih thu a sawi a, a chhungte a tawrhpui thu a sawi nghal bawk.

2008-batch Indian Foreign Service (IFS) officer, Arya thih chhan hi hriatchian a la ni lo.

Palestinian foreign ministry chuan Ambassador Arya thihna chuan a ṭhawng hle tih sawiin, "Chanchin lungchhiat thlak tak kan hriat veleh president Mahmoud Abbas leh prime minister Muhammad Shtayyeh-te chuan security, police leh public authority-te bakah Ministry of Health and Forensic Medicine-te chu Indian ambassador chenna hmunah rang taka a thihchhan chhui chiang turin an tir nghal a ni," tiin an thuchhuahah an tarlang.

Ministry chuan India rama external affairs ministry-te nen Arya ruang thawn haw dan tur chungchangah inbiakna an neih mek thu an sawi.

Arya hi Kabul leh Moscow-a India embassy bakah Ministry of External Affairs headquarters Delhi-ah te pawh a lo thawk kual tawh a. UNESCO, Paris-ah India aiawhin palai a ni tawh bawk. Delhi University leh Jawaharlal Nehru University-ah economics zirin, a zir zawhah Indian Foreign Service-ah a inziak tling a ni.