CBI-in NSE CEO hlui Chitra Ramkrishna an man

Central Bureau of Investigation (CBI) chuan National Stock Exchange Chief Executive Officer (CEO) hlui Chitra Ramkrishna chu Pathianni khan an man.

Chitra Ramkrishna hi kum 2013-2016 inkar khan NSE CEO hna hi chelhin, he hna a chelh chhung hian NSE thuruk pawimawhte chu email hmangin 'Himalayas-a cheng yogi' tia sawi hnenah a thawn ṭhin nia puh a ni. A hnuah tun thla tir lama he thubuai kaihhnawiha man, NSE-a thawk ṭhin Anand Subramaniam chu he 'yogi' tia sawi hi a nih rinhlelh a ni zui bawk.

SEBI (Securities and Exchanges Board of India)-in kum 2010-2015 inkara NSE-a thil tihdan dik tawk lo awm nia a hmuhchhuahte a puanzar hnuaha Chitra Ramkrishna chungchang hian ngaihven a hlawh zui ta hle a ni. SEBI chuan Ramakrishna hian NSE thupuk pawimawh tam tak chu kum 2014-2016 inkar khan mi tu tih hriat loh hnenah email hmangin a lo thawn ṭhin tih hmuhchhuak lehin, a finfiahna pawh a awm thu a puang a ni.

Kum 2018 khan CBI chuan NSE system-ah thil felhlel a awm vang hian FIR a ziaklut a ni.