CVC hmaah CBI director inlan

Central Bureau of Investigation (CBI) director Alok Verma chu a deputy leh CBI special director Rakesh Asthana-an eirua a puh chungchangah nimin khan a ni hnihna atan Central Vigilance Commission (CVC) hmaah a inlan leh.

Verma hian Asthana-an a puhna hrang hrang a dik loh ziate chu Vigilance Commissioner TM Bhasin leh Sharad Kumar te hmaah a sawifiah a ni. He hunah hian CVC in a chhui hna enfiah pui tura Supreme Court-ina ruat, Supreme Court judge hlui Justice AK Patnaik pawh a tel.

Verma hi CVC office-ah hian darkar khat vel a awm a ni.

Supreme Court chuan October 26 khan Asthana-an Verma a puhna chungchang a chhui chu kar hnih chhunga zo turin a lo hrilh tawh a ni. He hun tiam hi Pathianni hian a tawp dawn a, karleh Thawhṭanniah SC hian a ngaituah ang.

Ningani khan Verma hian CVC commissioner KV Chowdary chu darkar hnih chhung hmuin, Asthana-an eirua a puhna te chu a dik loh thu a lo sawi tawh bawk. Asthana pawh hi CVC hmaah a inlan tawh nia sawi a ni bawk.

CBI director leh special director-te hi thamna laah an inpuh tawn a, hei vang hian sorkar laipui chuan an pahnih hian chawlh a laktir a ni.