Indian Army hnenah ralthuam thar hlan

Maharashtra-a Deolali artillery centre-ah nimin khan Indian Army te hman turin ralthuam thar, artillery gun leh equipment te hlan a ni a, heng zingah hian K9 Vajra pathum, M777 howitzers 10 bakah Common Gun Towers artillery tractor-te an tel.

Nimina ralthuam thar hlanna inkhawm hi Defence Minister Nirmala Sitharaman leh Army Chief General Bipin Rawat-ten an hmanpui a ni.

Silai leh artillery thar an neih hmang hian sipaite chuan tlang chhengchhe kara hmelma awmte pawh awlsam zawkin an bei thei dawn a ni.

K9 Vajra hi Indian private sector-in artillery gun a siam hmasak ber a ni. He silai hi km 23-28 thleng kap pha a ni a, second thum chhungin round thum a kapchhuak hman a, minute thum-ah round 15 leh minute 60-ah round 60 kap thei tur a ni. Indian Army chuan kum 2020 November thlaah hetiang silai 100 hi a nei hman dawn a, a man hi cheng vaibelchhe 4,336 a ni ang. A thawh hmasa ber atan, tun thla chhung hian silai 10 chu hlan an ni dawn tih Defence Ministry thupuangtu Colonel Aman Anand chuan a sawi. Kum 2019 November thlaah silai 40, November 2020-ah silai 50 hlan leh an ni ang.

M777 Ultra Light Howtizers 155 mm hi US sorkar hnen aṭanga lei a ni a, silai 25 rawn thawn a ni dawn a, a bak 120 chu India ramah remkhawm a ni thung ang. Hei hi kawngpuia kalpawh theih lohna hmunah pawh phurh theih a ni dawn a ni. Army hian hian 145 M777 howitzers regiment pasarih a nei dawn a, silai panga chu nakkum August thla khian Army hnenah hian hlan a ni ang a, a bak chu a hnu thla 24 chhunga zawhfel hman tum a ni. Regiment hmasa ber hi nakkum October thlaah zawh tum a nih thu Defence thupuangtu chuan a sawi.

Ultralight Howitzer M-777 145 leina tur hian US chu contract ziahpui a ni a, heng zinga 25 chu peihsa vekin rawn thawn a ni ang a, a bak 125 chu India ramah Mahindra Defence puihnain siam a ni ang. He silai supply hna hi nakkum March thla aṭanga ṭan hman beisei a ni.