Vawiinah Chhattisgarh inthlan thawh khatna nei dawn Duty turin security force nuai khat tir lut

Chhattisgarh-a state assembly inthlan thawh khatna, vawiina neih tura inthlan tluang taka neih a nih theih nan venhim hna thawk turin security force nuai khat tirh luh an ni.

Inthlan thawh khatna hi Maoist hel hluarna district pariat-a seat 18-ah neih a ni ang.

Chhattisgarh Special Director General (Anti-Maoist Operations) DM Awasthi chuan security force zingah hian central paramilitary force pawh an tel tih a sawi a, boruak ṭha tak hnuaiah inthlan hi buatsaih theih an beisei thu a sawi. Maoist-te lo dang a, inthlan felfai tak buatsaih a nih theihna atana sipai tirh luh company 650 zingah hian CRPF, BSF, ITBP unit-te bakah state dang aṭangin police force 65,000 an tel bawk.

Hetihlai hian Maoist helte chuan inthlan hi an boycott a, inthlan neih tur tihbuai tumin tunhnaiah an che hluar chho hle a, ni 10 kalta chhung khan Baster bial leh Rajnadgaond district-ah security force-ten IED 300 chuang an man tawh a ni. Nimin khan helho hian Kanker district-ah IED paruk tipuakin, bomb puakah hian Border Security Force (BSF) sub-inspector a thi. Maoist leh security force-te chu nimin vek khan Bijapur district-ah an inkap bawk a, hel pakhat kahhlum a ni.

Police-te chuan Kattakal leh Gome khaw inkarah security force-te beihnan Maoist-te hian IED paruk chu zing dar 8.30 velah an tipuak tih an sawi. BSF te hi Koliyabeda area aṭanga an camp lama an kir lam a ni.

Chhattisgarh-a Maoist hel hluarna district pariat-ah assembly seat 18-ah vawiin hian vote thlak a ni dawn a, a bak seat 72-ah chuan November 20 hian vote thlak a ni ang. Constituency 10-ah chuan vote thlak hun hi zing dar 7 aṭanga tlai dar 3 thleng hawn a ni ang a, bial 8-ah erawh chuan zing dar 8 aṭanga tlai dar 5 thleng vote thlak theih a ni thung ang. Bastar bialah chuan Maoist helten an tihbuai hlauhthawn avangin polling station 245 zinga 76 chu hmun himah sawn an ni. Vote tla hi December 11-ah chhiarin result puan nghal a ni ang.