Himachal Pradesh-ah school bus kum 15 aia upa hman khap

Himachal Pradesh sorkar chuan mipui him zawkna atan school bus-ah motor kum 15 aia upa hman a khap a, school bus driver atan kum 60 aia upa chhawr a khap bawk.

State sorkar thupuangtu chuan he kaihhruaina thar siam hian school bus bakah, school naupangte hruaina atana hman ṭhin van-te pawh a huam tel vek tih a sawi.

April 9 khan Kanga district-ah school bus chesualin, zirlai 24, kum 9-12 inkar te an thi a ni. He chhiatna thleng vang hian state sorkar chu school naupangte himna tur atana hma la turin a nawr chhunzawm a ni. Kar kalta khan Principal Secretary (Transport) Jagdish Sharma chuan thupek hi a tichhuak ta a ni.

Sorkarin dan thar a siamah hian school bus driver-te chuan motor lian khalhah experience kum nga tal an nei tur a ni tih a ni a, hei bakah hian kumtinin a mit enfiah tir tur tih a ni bawk. Driver leh conductor chu thawmhnaw zahawm taka inthuam tura tih niin, an hming inziahna an tar bawk tur a ni. School bus tinah hian tracking system, CCTV camera awmin, speed limit hi 40 km per hour a ni tur tih a ni.