Eptu party-ten Anti-BJP platform siam tum

BJP kaihhruai National Democratic Alliance (NDA) eptu political party hrang hrangte chuan November 22 hian Delhi-ah meeting hmasa ber an nei dawn a, kum 2019 Lok Sabha inthlanpui neih tura thawhho theih dan tur an sawi ang.

Andhra Pradesh Chief Minister, Telugu Desam Party (TDP) hruaitu N Chandrababu Naidu leh Congress general secretary Ashok Gehlot-te chuan nimin khan joint conference neiin, eptu party joint meeting neih tur chungchang hi an sawilang a ni.

Chandrababu Naidu chuan eptu party te hmalak tumnaah hian Congress president Rahul Gandhi pawh hma hruai tura a ngen thu leh, ani pawhin rem a tih thu a sawi.

November 22-a meeting neih turah hian anti-Bharatiya Janata Party (BJP) forum dinna tura hmalak dan turte sawiho a ni dawn a, Prime Minister Narendra Modi-a kaihhruai NDA sorkarin mipuite tana harsatna thlen dan hrang hrang leh, official leh institute te a duhdan anga a kaihhruai dante mipuite hrilh hriat an nih theihna tura hmalak dan tur ruahmanna te siam a ni ang. NDA sorkarin politics lama a khingpuite rahbehna tura Central Bureau of Investigation (CBI), Income Tax department leh agency danga official-te a thunun dan te, institution te hnathawk thei loa a siam dan te leh pawisa note tihthihin nghawng ṭha lo tak a neih dante chu beihlet an tum dawn a ni.

Naidu hian eptu party hrang hrang hruaitute pawh a lo kawm kual tawh a, November 19 hian BJP dodaltu lian ber zinga mi, West Bengal chief minister Mamata Banerjee-i pawh a hmu ang. Naidu chuan Banerjee-i nen hian telephone-in an inbe tawh a, eptu ṭangrualte hmalakna pawh a zawm ngei tur thu a sawi.