CVC-in SC-ah Alok Verma chhuina report thehlut

Central Vigilance Commission (CVC) chuan Central Bureau of Investigation (CBI) director Alok Vermna-a thamna laa puhna chungchang a chhuina report chu nimin khan Supreme Court-ah sealed cover in a thehlut.

Report hi Chief Justice Rajan Gogoi leh Justice SK Kaul awmna bench chuan lo dawngin, hearing neih leh hun atan November 16 a ruat nghal bawk.

Kar kalta Zirtawpni khan Alok Verma-an thamna laa puh leh, CBI director a nihna aṭanga chawlh laktir a nih chungchanga petition a thehluh chu ngaihtuah a ni. Hearing neihnaah hian CBI director lailawk M Nageswar Rao chuan October 23 aṭanga Zirtawpni thlenga agency head hna a chelh chhunga an hmalakna leh thutlukna a siam hrang hrang report a thehlut nghal bawk.

Solicitor General Tushar Mehta chuan CVC in Alok Verma chungchang a chhui hna chu November 10 khan zawhfel niin, Supreme Court judge hlui AK Patnaik-an a enpui tih a sawi. Mahse Pathianni a nih avangin report hi an thehluh lo tih sawiin, thupha a chawi nghal a ni. Hetihlai hian CJI chuan Pathianni-ah pawh Registry chu hawn reng a ni, a ti.

October 26 khan Supreme Court chuan Verma puhna chungchang chhui hna chu kar hnih chhunga zo fel turin CVC hi a lo hriattir tawh a ni. Hei bakah hian CBI director lailawk atana ruat, M Nageswarao Rao chu Verma chungchang ngaihtuah fel a nih hma chuan agency hmalaknaah thutlukna lian tham lo siam lo turin a ti bawk.

Kar kalta chhung khan Verma pawh hi a deputy leh Special CBI director Rakesh Asthana-an thamna sum laa a puh chung-changah member pathum awmna, CVC panel hmaah inlanin a lo insawifiah tawh bawk a ni.