Sorkarin Rafale fighter jet man zat tur thehlut

Supreme Court-in a hriattir angin, sorkar laipui chuan nimin khan Rafale deal siam a nih dan kimchang leh, fighter jet leina zat tur chu sealed cover-in court-ah a thehlut.

Sorkar laipuiin document a thehluh hi "Details of the steps in the decision making process leading to the award of 36 Rafale fighter aircraft order' tih a ni a, inremna siam a nih dan te, fighter jet man zat turte a tarlang a ni.

October 31-a Rafale deal siam a nih danah thil dik tawk lo a awm nia sawia petition thehluhte a ngaihtuahnaah, court chuan sorkar laipui hnenah hian eng vanga Rafale jet a leina hman puangzar thei lo nge a ni tih sawi turin a lo ti tawh a ni. Hei hi chhangin, sorkar aiawh chuan he inremna siam chungchangah sorkar chuan engmah thup tur a nei lo tih a sawi a, mahse a man zat hi SC judge te hnenah chauh hriattir a ni ang, tiin a sawi a ni.

Sorkarin affidavit a thehluhah hian India leh France-in Rafale fighter jet lei tura inremna an siamna tur hi kum 2016, August 24 khan Cabinet Committee on Security chuan a pawmpui a, hemi kum vek September 23 khan inremna hi tihfel a ni.

India-in Indian Air Force thuam chakna tura Rafale fighter jet 36 a lei tum hi France aerospace company Dassault Aviation siam niin, twin-engine Medium Multi Role Combat Aircraft (MMRCA) a ni.

Congress party chuan he inremna siam danah hian thil fel tawk lo a awm niin a sawi a, Prime Minister Narendra Modi pawh a inrawlh niin an puh a ni.

Rafale deal petition hi advocate pahnih Manohar Lal Sharma leh Vineet Dhanda ten an thehlut hmasa a, a hnuah AAP MP Sanjay Singh-an thehlut ve lehin, union minister hlui Yaswant Sinha, Arun Shourie leh activist lawyer Prashant Bhushan te pawhin an thehlut leh a ni.