Union minister Ananth Kumar a thi

Union Minister Ananth Kumar chu nimin zing khan Bengaluru-ah kum 59 mi niin a thi. A nupui Tejaswini leh a fanu pahnih, Aishwarya leh Vijeta te a kalsan a ni.

Bharatiya Janata Party (BJP) hruaitu hi cancer natna vangin Bengaluru-a private hospital-ah enkawl a ni a, nimin zing dar 2 khan a thi a ni. A ruang hi zahna hlan duhte tana tlawh theih turin National College-ah dah rih a ni ang.

Kumar hi Bengaluru South Lok Sabha MP niin, term rukna a hmang mek a ni.

Prime Minister Narendra Modi chuan Ananth Kumar chu a ui thu sawiin, a thawhpui leh a ṭhian ṭha tak a ni tih a sawi. Hruaitu ṭha, kum naupangtea mipui rawngbawl tura inpe leh rinawm leh tih tak zeta rawngbawltu a nih thu a sawi a, a hnathawh ṭhatte avangin hriatreng a ni dawn a ni, a ti. BJP tan pawha rohlu tak a nih thu sawiin, ministerial portfolio hrang hrang pawh tlin taka enkawl thei, roreltu ṭha tak a ni, tiin a bial mipuite tan inhawng zau tak a nih thu a sawi.

Ananth Kumar hi Union minister for Chemical and Fertilizers bakah Ministry of Parliamentary Affairs a ni bawk. Cancer natna a nei vangin ram pawn lamah pawh a lo inenkawl tawh a, October thla khan Bengaluru-ah rawn kirin, ṭhat lam a pan theih loh avangin private hospital-ah dah luh leh nghal a ni.

Kumar hi Bengluru-ah kum 2959, July 22 khan a piang. Hubli-a KS Arts College aṭangin a graduate a, a hnuah JSS Law College-ah LLB a zo leh a ni.