SC-in Covid death certificate lem siam tawh lo turin ti

Supreme Court chuan zángnadawmna phûta Covid-19 vanga thi nia chhal a, medical certificate lem siam awm ṭhin chu ti tawh lo tura vauin, hetianga thil dik lo tih awm ṭhin chu tihtawp a nih theihna tura chhui tir pawh a la ngai mai thei tih a sawi.

Justice MR Shah kaihhruai bench chuan Covid-19 vanga thi chhungte hnena zangnadawmna pek ṭhin an dawn duh vanga doctor-ten dik lo takin death certificate an pechhuak ṭhin chu pawi an tih thu an sawi.

Sorkar laipuiin kaihhruaina a lo siam tawh angin, Covid-19 vanga thite chu he hripui vanga thi an ni ngei tih finfiahna a awm chuan zangnadawmna, Rs 50,000 chu an chhungte hnenah pek ṭhin an ni.

Sorkar laipui aiawha inlan, solicitor general Tushar Mehta chuan Covid-19 death certificate lem siam an awm thu leh, hetiang thil hi ven a nih theih dante a sawi ve bawk. Hripui vanga thi an awmin, an chhungten zangnadawmna an dilna tura hun bithliah siam a ṭul thute a sawi. "Zangnadawmna dil theih hun hi hun tiam awm loa kalpui theih reng a ni dawn lo a, hei vang hian bithliah siam a ngai a ni. A dil theih chin ni zat hi bithliah a ngai a, duh chen chen hun hawnsak chu a ṭha ber lo," a ti.

Bench pawhin zángna­dawmna dilna thehluh theih hun pawh bithliah siam a ngaih thu a sawi bawk a, hun bi siam a nih loh chuan kum 5-6 hnuah pawh an la dil thei reng dawn tih a sawi a ni.

Supreme Court hian nimin khan lawyer-cum-petitioner, Gaurav Kumar Bansak-a'n Covid-19 hri vanga thi chhungte zangnadawmna pe tura ngenna a thehluh chungchang a ngaihtuah a, March 14-a ngaihtuah chhunzawm turin a dah.

Sorkar laipui hnuaia disaster management kaih­hruaina siamin, Covid-19 hri vanga thi chhungte hnena zangnadawmna Rs 50,00 pe tura a lo tih chu Supreme Court hian a lo pawmpui tawh a, sum hi dilna thehluh a nih aṭanga ni 30 chhung ngeia pe turin a ti a ni. Zangnadawmna pek tur chungchang buaipui tur hian state leh UT sorkar tinte hnenah State Legal Services Authority (SLSA) thawhpui tura nodal officer, Chief Minister Secretariat-a Deputy Secretary rank aia hniam lo ruat turin a lo hriattir vek tawh bawk.

Maharashtra-ah chuan official-a chhinchhiah danin, Covid-19 vanga thi hi 1,43,706 an nih laiin zangnadawmna diltu hi 2,41,000 an chuang a ni. Kerala-ah pawh zangnamdawmna dil hi an tam hle nia sawi a ni bawk a, hei vang hian ṭhenkhat certificate hi a lem a nih mai theih thu bench chuan a sawi.