Ni 662 hnua Covid-19 kai hmuhchhuah tlem ber ṭum thleng

India ramah Thawhṭanni khan coronavirus kai thar mi 3,993 awm belh lehin, ni 662 hnua hri kai hmuhchhuah tlem ber ṭum a nih thu Union Health Ministry data chuan a tarlang. Ramchhungah Covid-19 kai hmuhchhuah hi mi 4,29,71,308 awm tawhin, hri kai mek, active case chu 49,948-ah a tlahniam tawh thung. Hri kaihhnawih vanga thi mi 108 awm belhin, thihpui tawh zat hi mi 5,15,210 an tling tawh a ni.

Hri kai tawh aṭanga hri kai mek zat chu 0.12% an ni mek a, Covid-19 kai dama puan, recovery rate chu 98.68% in a sang chho leh tih ministry chuan a tarlang.

Nitina hri kai zat, daily positivity rate chu 0.46% ni mekin, kartina hri kai thar zat, weekly positivity rate hi 0.68% a ni. Covid-19 kai dama puan chu mi 4,24,06,150 an tling chho tawh a, hri vanga thi zat, case fatality rate chu 1.20% a ni thung.

India rama Covid-19 hri leng tuar nasa ber, Maharashtra state-ah chuan Thawhṭanni kha kum 2020, April hnua hri kai thar tlem ni niin hri kai thar hi 225 an awm a, thihpui an awm lo bawk. An state-ah hian active case hi 3,742 chauh an awm tawh a ni.

Ramchhunga covid-19 vaccine semchhuah hna kalpui a nih hnuah, mi vbc 179.13 chuangin vaccine an la tawh a ni.