March 31-ah RS seat 13-ah inthlan buatsaih dawn

Election Commission of India chuan Rajya Sabha seat 13-ah March 31 hian inthlan buatsaih a ni dawn tih a puang.

Heng seat 13-te hi state paruk- Assam, Himachal Pradesh, Kerala, Nagalnd, Tripura leh Punjab-a mi niin, member term hi April 2 leh April 9-te hian a tawp dawn a ni. Member term tawp tur zingah hian Congress veteran AK Antony leh Anand Sharma te an tel.

Inthlan neih tur atan hian March 14-ah hriattirna tichhuakin, chuh tumte tan March 21 thleng nomination paper thehluh theih a ni ang. March 21-ah nomination-te hi enfiahin inhnukdawk duhte tan March 24 thleng hun hawn a ni dawn a ni. March 31-ah vote thlakin, hemi ni vek tlai dar 5-ah vote tlate hi chhiar nghal an ni ang.

April, June leh July thla tir lam hian Rajya Sabha member term eng emaw zat a zo dawn bawk a, President thlanna an neih hmain Rajya Sabha seat 73 vela inthlan hi buatsaih hman a ni ang. July thlaa term tawp tur zingah hian P Chidambaram (Congress), Piyush Goyal (BJP), Ambika Soni (Congress), Kapil Sibal (Congress), Mukhtar Abbas Naqvi (BJP), Praful Patel (NCP), Sanjay Raut (Shiv Sena) leh Satish Chandra Mishra (BSP) te pawh an tel.