Chhattisgarh inthlan thawh khatnaah vote tla ṭha

Chhattisgarh-ah Thawhṭanni khan assembly inthlan thawh khatna neih a ni a, constituency 18-ah vote thlakin vote tla hi 70% a tla pha. Inthlan ni hian Bijapur leh Sukma district-a Naxal hel leh security force-te inkahnaah hel paruk kahhlum a ni.

Inthlan thawh khatnaah hian vote thlakna tur polling booth 4,336 siam niin vote nei mi maktaduai 31 an awm a, candidate 190 an awm bawk. Candidate zingah Chief Minister Raman Singh pawh a tel a ni.

Naxal hel hluarna bial 10-ah vote tla hi 60% a tling pha bawk. Naxal hel hian inthlan hi an boycott a, inthlan tihbuai tumin a hma aṭangin pawikhawihna pawh an lo thlen fo a ni.

State chief electoral officer Subrat Sahoo chuan hmun kilkhawr zawk aṭangin report an la dawng kim lo tih sawiin, report a luh kim hunah chuan vote tla zat pawh hi a la san belh a rin thu a sawi. Vote thlakna atana hman EVM zinga 1% leh VVPAT zinga 1.9% chauh thlak ngai a awm thu EC official Sudeep Jain chuan a sawi bawk.

Hmun tam zawkah boruak ṭha tak hnuaiah vote thlak theih a ni a, hetihlai hian Bijapur bul Majiguda khaw ram hnuaiah CRPF patrol leh Naxal helho an inkap a, hel pali kahhlum niin sipai pahnihin hliam an tuar. Sipaite hi CRPF 204 Commando Battalion for Resolute Action (CoBRA) team ami te an ni. Sukma district-a District Reserve Guard (DRG) leh helho inkahnaah hel pahnih kahhlum an ni bawk. Hel ho hian Nayanar khaw bulah IED an tipuak bawk a, mahse thi leh hliam an awm lo. Dwarapar polling booth panna kawnga IED an dah chu a puah hmain hmuh a ni a, sut nghal a ni.