Citizen List kalpui turin ram pumah kan campaign ang : Amit Shah

BJP national president Amit Shah chuan kum 2019 Lok Sabha inthlanpui neih turah thlan tlin leh anih chuan National Register of Citizens kalpui a nih theih nan ram pum huapin campaign an nei dawn tih a sawi.

BJP chuan dan loa ram chhung rawn lutte dapchhuah a, thawn kir a tum tih a sawi. An duhthusam tihpuitlin a, India ram ropui siam tur chuan panchayat aṭanga Parliament thlengin hun rei tak tihbuai loha thuneihna an chan a ngai a ni, a ti bawk.

"Kum 2014-a BJP in thuneihna a chan aṭang khan ram himna lam pawh kan thuam chak hle a, Assam-ah NCR kan kalpui tawh a, dan loa lut mi nuai 40 zet hriatchhuah an ni", tiin BJP hruaitu chuan Madhya Pradesh-a assembly constituency 230-a booth-level worker-te chu video conferencing hmangin a hrilh.

Congress president Rahul Gandhi pawh bei nghalin, NRC chu Congress chuan an dodal niin a puh. NCR chungchangah an ngaihdan chu dik tak tarlang tura phutin, ram mipuite hnenah dan loa ramchhunga rawn lutte chu thawn kir an duh nge duh lo tih sawichiang turin a phut. Hei bakah hian Congress party chu Maoist helte laka nemah a puh a, BJP erawh chuan helho lakah na takin hma a la mek thung a ni, a ti.

Shah chuan mipuite chuan Modi-a kaihhruai sorkar an ringtawk a, 2019-ah pawh an vote leh ngei dawn a ni, a ti. Hemi hnu hian dan loa rawn lutte thawn kir vek an nih theih nan rampumah campaign kan nei dawn a ni, a ti.

BJP president chuan an party worker-te chu in tin tlawh a, NRC leh Maoist hel chungchanga an party hmalak tumna chu mipuite hrilh hre turin a chah bawk.