Delhi air quality la ṭha lo hle Mipuite pawn chhuak tam lo turin ngen

Delhi thuneituten kawng hrang hrangin khawpui chhung boruak chhe zel tur veng turin hma la mah se awmzia a nei hlei thei lo. Khawpui chhung hmun ṭhenkhata air quality chu nimin thleng khan 'poor' leh 'very poor' category-ah an la awm.

Khawpui boruak bawlh-hlawh hi mihring hriselna atana hlauhawm thei a nih avangin System of Air Quality and Weather Forecasting (SAFAR) chuan mipuite chu pawn chhuak tam lo a, a tam thei anga inchhunga awm turin an ngen. Pawn lama hnathawh leh infiamnate pawh ti rih lo a, a theih ang anga inchhung lama thawk turin a chah a, thawhhah neite tan damdawi inchhawp reng turin a chah.

In chhunga awm pawhin tukverhte khar phui turin mipuite chu ngen an ni a, thing, mombati leh thil hal rimtui te pawh hal rih lo turin ngen an ni bawk. Inchhung vawng fai tur leh, vaccum hmang lo tur te, hmunphiah pawhin a khu tiziawm tura hmun tihfaite tihuh turin an chah a ni. Pawn chhuah ngai te pawh hmai tuamna, N-95 emaw P-100 te hmang turin hrilh an ni bawk

Khawpui boruak bawlh-hlawh zel venna kawng khat atan CNG vehicle chauh tlan phal a ni dawn nia sawi a ni bawk. Supreme Court-in a ruat Environment Protection Control Authority (EPCA) chuan khawpui boruak hian ziaawm lam a pan loh chuan non-CNG private leh commercial vehicle-te chu khap a tum thu a lo sawi tawh bawk a ni. EPCA hotu Bhure Lal chuan October 31 khan non-CNG motor khap hi a rawt tawh a ni.