NDA-in loneitute aiin Ram Temple dah pawimawh : Sharad Pawar

National Congress Party (NCP) president Sharad Pawar chuan central-a BJP kaihhruai NDA sorkar chuan loneitute hamṭhatna tur aiin Ram Temple a dah pawimawh zawk a ti.

Mumbai-a loneitu pawlte inhmukhawmnaa thu a sawiah, Pawar chuan sorkar laipuia thuneitute chuan ramchhunga loneitute harsatna hrang hrang tawh mek chungchang sawiho aiin, Ram Temple an buaipui zawk a ni, tiin a sawi.

Pawar chuan Prime Minister Narendra Modi-a kaihhruai sorkar chuan ram mipuite chu sakhaw behchhana ṭhendarh tumah a puh bawk. "Loan ngaihdam emaw, policy dang emaw pawh ni se, sorkar laipui hian loneitute tana policy ṭha a siam hlawhtling thei lo a, an harsatna tawhte pawh a ngaihsak lo a, Ram Temple ringawt an buapui a ni. Hei hi mipuite pawhin kan hriat a ngai a ni", ti.

Modi-a sorkar hnuaiah kum li chhungin agriculture sector chuan hma a sawn lo a, sorkar report-ah pawh an sum lakluh pawh a pung lo a ni, tiin Pawar chuan a sawi. He dinhmun hi thlakthleng a ngai tawh a, sorkar thlak a ngai tawh a ni tiin a sawi.