Delhi-ah hmaituamna vuah lo Rs 2,000 chawitir dawn

Delhi khawpuiah Covid-19 hri kai an pun chak leh avangin nimin khan chief minister Arvind Kejriwal hoa all-party emegency meeting neihah hma lak dan tur rel a ni a, meeting chuan pawn chhuahnaa hmaituamna hmang lote Rs 2,000 zel chawitir an rel. 

CM Kejriwal chuan political party leh social organisation hrang hrang hnenah mipuite hnenah a thlawna hmaituamnna sem turin a ngen nghal bawk. 

Hri kai an pun chak leh tak avangin sorkar laipuiin Delhi-a Intensive Care Unit (ICU) khum a siam belh leh avangin Kejriwal chuan lawmthu a sawi bawk. 

Nilaini khan Delhi-ah hian hri kai hmuh thar mi 7,486 awm belh lehin, mi 131 in an thihpui bawk. Ni khata hripui vanga thi an tam ber ni a ni. Delhi-a Covid-19 kai hmuh chhuah tawh hi nuai nga an chuang tawh a, he hri vanga thi hi 7,943 an tling tawh bawk a ni. 

Delhi-a AAP sorkar chuan hri kaite enkawlna turin hospital hrang hrangah ICU khum 660 siam belh turin hma a la mek a, Railways chuan khum 800 awm theihna tur rel pindan chu hri kaite enkawlna atan a siam dawn bawk. 

Damdawiin hrang hrangte chu Covid-19 hri kaiten enkawlna ṭha an dawn vek theihna turin non-emergency operation chu chawlh san rih turin sorkar chuan a ngen dawn bawk. Kerjiwal chuan, "Tonsil zai ngai chu emergency a nih hran loh avangin thla thara zai turin a sawn theih a ni. Hetiang hian emergency ni lote chu a theih ang ang inzai hunte sawn rih turin hospital-te kan ngen dawn a ni," a ti. Private hospital-te pawh ICU khum an neih zat aṭanga 80% leh, non-ICU khum 60% chu Covid-19 kaite enkawlna atana ruahman turin ngen an ni bawk. 

Hri kaite enkawlna kawnga thawktute pui turin paramilitary force aṭangin doctor 45 leh para­medic 160-te chu Delhi-ah hian thawn luh an ni tawh bawk a ni.

Delhi khawpuiah hian October thla tawp lam aṭang khan Covid-19 hri leng thawh thumna a thleng mek nia sawi a ni. Hei vang hian sorkar chuan hri dona kawnga khuahkhirhna a siamte pawh a tihkhauh chhoh leh mek a, mahse lockdown puan erawh a tum lo tih a sawi.  

Union health and family welfare minister Dr Harsh Vardhan chuan thla 3-4 hnuah Covid-19 vaccine chu peihfel a nih theih a rin thu a sawi.

 

Vaccine hi peihfel a nih hunah healthcare worker leh corona warrior-te chu pek hmasak an ni dawn a, hemi hnuah kum upa zawk leh natna benvawn neite ngaih pawimawh leh a ni ang. Vaccine sem chhuah dan tur kimchang hi buaipui mek a ni, tiin minister chuan nimina ''The Shifting Healthcare Paradigm During and Post-Covid'' tih thupui hmanga FICCI FLO webinar neihnaah a sawi a ni.