Haryana-ah bawng task force din dawn

Member 11 awmna bawng task force, 'Special Cow Task Force' chu Har­yana-ah din a ni dawn a, he task force hian bawng talh leh hralh tihtawpna turin hma an la dawn a ni. 

Bawng task force-ah hian sorkar aṭang leh sorkar lo aṭangin member an awm dawn a, Animal Husbandry department, Urban Local Bodies department aṭangin officer an tel dawn a, Haryana Gau Seva Ayog, Gaurakshak Committee leh Gausevaks aṭangin member panga an tel bawk ang.

Haryana chief minister Manohar Lal Khattar chuan Haryana khaw chhunga bawng task force chuan bawng hmanga insumdawnna leh bawng talh ṭhinte  sorkarah an report ṭhin tur thu a sawi. Heng task force-te hi tualchhungah thawhpui an nei dawn bawk a, chumi hmang chuan bawng hralh ruk a ni emaw talh chungchang emaw pawh  an hre thei ṭhin dawn a ni.

Nilaini khan Haryana chief minister ho hian bawng humhalh chungchanga hmalak dan turte rel ho a ni a, meeting-ah hian Ayog chairman Sarwan Kumar Garg leh Animal Husbandry and Dairying Department aṭangin official eng emaw zat an tel a ni. 

He hunah hian bawng in satu leh enkawltu, Gaushala-te ṭanpuina pek dan pawh an rel bawk.