SC-in Rafale jet leina man zat zirchiang dawn

Sorkar laipui leh France sorkarin Rafale fighter jet leina tura inremna an siam danah BJP leh eptu pawl lian ber Congress chu an la inbei tawn zel a, hetihlai hian Supreme Court chuan sorkar laipuiin inremna siam anih dan sealed cover-a a thehluh a Rafale fighter jet 36 a tarlan chu a zirchiang dawn.

Chief Justice Ranjan Gogoi, Justices SK Kaul leh KM Joseph te awmna bench chuan Rafale deal chungchanga petition thehluhte chu a ngaihtuah dawn a ni. Petition thehluttute hian inremna siam anih dan hi court-in a enpuina hnuaia chhui chian an phut an ni.

Prime Minister Narendra Modi-a kaihhruai sorkar chuan Supreme Court-in a hriattir angin Thawhṭanni khan inremna siam a nih dan kimchang, "Details of the steps in the decision-making process leading to the award of 36 Rafale fighter aircraft order" document phek 14-a chhah chu court-ah hian a thehlut a ni. Sorkar chuan Rafale fighter jet 36 leina man tur pawh a thehlut tel nghal bawk.

Sorkar laipui chuan France nena inremna ziahfel a nih hma hian Cabinet Committee on Security (CCS) phalna pawh lak a nih thu a tarlang.

Indian Air Force te thuam chakna turin sorkar laipui chuan France aerospace company Dassault Aviation hnen aṭanga Rafale fighter jet 36 leina turin cheng vaibelchhe 58,000 inremna a siampui a ni. Mahse Dassault Aviaton chu contract a hmuh theihna tur hian Anil Ambani-a company, Reliance Group thawhpui tura tih a ni tih company official pakhat chuan a lo sawi lang tawh a, hei vang hian inremna siam a nih dan hi chhuichiang turin eptute chuan an phut a ni.