East Asia Summit hmangin PM a zin

Prime Minister Narendra Modi chu ni hnih awh East Asia Summit hmang turin nimin khan Singapore a thleng.

PM hian East Asia Summit bakah ASEAN-India informal meet, Regional Comprehensive Economic Partnership summit pawh a hmang nghal dawn a, nimin khan US Vice President Mike Pence nen meeting an nei bawk.

Singapore pana a chhuah hmain, PM Modi chuan ASEAN-India leh East Asia summit a tel tur chuan India-in ASEAN member te leh Indo-Pacific region nena inzawmna tihngheh a duh zia a lantir a ni, a ti.

PM hian summit kar lakah Singapore prime minister Lee Hsein Loong leh Australia prime minister Scott Morrison pawh a hmu dawn a ni.

India leh ASEAN hian sumdawnna leh economy lama inzawmna ṭha tak neiin, kum 2017-18 chhunga an insumdawn tawnna hi US dollar tluklehdingawn 81.33 hu a tling pha a ni. Kumin January thla khan India hian ASEAN-India Commemorative Summit a lo thleng tawh bawk

Nimina PM Modi leh US VP Pence ten meeting an neihah hian defence leh trade lama ram pahnihte thawhdunna te, firfiaka chetna thleng do let dan tur chungchangte an sawidun. Pence hian firfiakten Mumbai khawpui an beihna champha vawi 10-na, November 26-a lo thleng tur chungchangte sawichhuakin, ram pahnih ten firfiakte do letna kawnga thawhdunna ṭha tak a nei chu a fak bawk. Hei bakah hian energy sector lama thawhdunna zau zawk neih a ṭul thu an sawi a, Modi pawhin US aṭanga oil leh gas US dollar tluklehdingawn 4 hu lakluh a nih thu pawh a sawilang a ni.