India leh China-in border talk vawi 15-na nei dawn

India leh China chuan naktuk, Zirtawpni hian Ladakh khaw chhak lama inhmuhthiam lohna thleng ṭhin chinfelna atan high-level military talk, ṭum 15-na an nei dawn tih defence establishment chuan a puang.

Ram pahnihten border talk an lo neih tawhte aṭang hian Pangong Tso chhim leh hmar, Galwan leh Gogra Hot Spring area-a buaina chinfel dan tur kawng dapna turin resolution an lo tichhuak tawh a ni. Mahse inbiakna neih hnuhnung ber, kumin January 12-a inbiak vawi 14-na neih ṭum kha chuan inremna engmah siam loin an titawp a ni.

Inbiak vawi 15-na hi Ladakh-a Chushuil Moldo meeting point-ah an nei dawn a, thla 22 chhung zet friction area-a ram pahnih sipaite inkar boruak ṭha lo tihtawp dan tur an ngaihtuah ang. Ram pahnihte hian inbiakna tluang taka neih an beisei thu leh inhriatthiam tawnna sang tak leh hmabak eng tak nei chunga inhmuh an beisei thu an tarlang tawh a ni.

Ladakh khawchhak lam ramria India leh China sipaite inkara buaina hi kum 2020, May 5-a chhuak niin, a hnuah Pangong lake area-ah an inbei zui a ni. He thil thlen hnu hian ram pahnihte hian ramri venhimna lam pawh khauh zawka kalpuiin, ramriah hian sipai ṭhahnem tak leh ralthuamte an dah luh belh a ni. Ram pahnihte hian Line of Actual Control (LAC)-ah hian sipai 50,000 - 60,000 vel an dah mek ve ve nia sawi a ni bawk.