Oil man chungchangah mipuite hmakhua ngaihtuah a ni ang : Oil minister

Petroleum minister Hardeep Puri chuan fuel man chungchangah sorkar chuan mipuite hmakhua ngai takin thutlukna a siam zel ang tiin a sawi.

Crude oil man sang zel avangin petrol leh diesel man a pung nasa dawn nia thuthang awm mek karah Thawhlehni khan Union Minister hian he thu hi a sawi a ni. "Oil man hi khawvel ramdang milin a kal ṭhin. Ram pakhatah indona a thleng mek a, hei hian oil company-te pawh a nghawng dawn a ni. Ram mipuite tana harsatna thlen lo tur ang berin thutlukna kan siam ang," a ti.

Uttar Pradesh, Punjab, Uttarakhand, Goa leh Manipur-a inthlan neih a nih avangin sorkar laipuiin oil mah hi a tihdanglam rih lo nia sawi chungchang chu thu dik lo a nih thu Puri chuan a sawi bawk. "Nikumah khan sorkar chuan petrol leh diesel-a chhiah lak chu litre khatah Rs 5 leh Rs 10-in a tihniam a, mahse hei hi hruaitu ṭhenkhat chuan assembly inthlan dawn vang niin an sawi ve leh bawk a ni,"tiin a sawi.

Crude oil chungchanga indaih lohna a thlen loh tur thu sawiin, Minister chuan ramin energy a mamawh angte a neih theihna turin an bei zel dawn tih a sawi a ni. Hetih lai hian India-in crude oil a mamawh zat aṭanga 85% hi ram dang aṭanga a lakluh niin, gas pawh a mamaw zat aṭanga 50-55% hi ram dang aṭanga lakluh a ni bawk.

Russia-Ukraine indona thleng mek avangin khawvel huapin crude oil man a to zel a, Thawhlehni khan Brent crude barrel khat man hi USD126 a kai tawh a ni.

India ramah thla li chhung chu petrol leh diesel man hi tihdanglam a ni tawh lo. Sorkar laipui chuan kum 2021, November 4 khan petrol leh diesel-a excise duty lak chu Rs 5 leh Rs 10-in a tihniam a, hemi hnu hian khawvel huapin crude oil man sang zel mah se India ramah chuan fuel man hi a pangngai anga kalpui a la ni.

Hetih lai hian state panga assembly inthlan zawhfel a ni tawh a, inthlan result hi March 10-ah puan a ni dawn a, hemi hnu hian fuel man hi tihsan a ni tawh dawn nia sawi thawm leh rinna a awm reng a ni.