IC-814 thlawhtheihna hruaikawitu Mistry Zahoor Ibrahim kahhlum a ni
Kum 1999-a Indian Airlines thlawhtheihna, Kathmandu aṭanga Delhi pana thlawk IC-814 lambuntu zinga mi Mistry Zahoor Ibrahim chu Pakistan rama Karachi-ah kahhlum a nih thu Pakistan sorkar chuan a puang.
Jaish-e-Mohammed (JeM) firfiak, kum tam tak chhung Zahid Akhund tih hminglem pua khawsa hi March 1 khan Karachi-a Akhtar Colony-ah, tu tih hriat loh silai keng pakhatin a luah vawi hnih kapin a hmunah hian a boral zui nghal a ni.
Mistry hi Karachi, Akhtar Colony-a Crescent Furniture neitu a ni. A vuinaah hian JeM dintu Masood Azhar unaupa, JeM operational chief ni lai Rauf Asgar pawh a tel nia sawi a ni.
Kum 1999, December 24 khan khualzin 179 leh crew member 11 chuanna, Indian Airlines thlawhtheihna, IC-814 aircraft chu Nepal aṭanga India lam pana a thlawhchhuah hnuah firfiak panga in an hijack a ni. Amritsar, Lahore leh Dubai lamahte thlawh kual tir a nih hnuah Afghanistan-a Kandahar-ah a ṭum a, hetih lai hian Afghanistan hi Taliban rorelna hnuaiah an awm.
Thlawhtheihna hruaikawitute hian passenger zinga pakhat, kum 25 mi an thah hnuah thuneitute nen an inbia a, an mi hrente thlengna atan India ram jail-a tang mek, Islamist firfiak Masood Azhar Alvi, Syed Omar Sheikh leh Mushtaq Ahmad Zargar-te chhuah zalen turin kum 1999, December 31 khan an inrem thei ta a ni.