State 5-a assembly inthlan result puang ; State 4-ah BJP chak, Punjab-ah AAP-in sorkarna siam dawn

11th March, 2022

State panga - Goa, Manipur, Punjab, Uttarakhand leh Uttar Pradesh-a February 10 - March 7 inkara assembly inthlan neiha vote tlate chu nimin khan chhiarin inthlan result puan a ni. Centre-a rorellai, BJP chuan Manipur, Uttarakhand leh Uttar Pradesh-ah sorkarna an siam leh dawn a, Goa-ah BJP kaihhruai sorkar a ding dawn bawk. Hetih lai hian Congress party erawh an la che chhe chhunzawm zel a, an rorel mekna Punjab-ah pawh chak zo loin, a ṭum khatna atan Punjab-ah AAP sorkar a ding dawn ta a ni.

Goa
Assembly seat - 40
Vote thlak ni - February 14
Chief Minister - Pramod Sawant (BJP)

Goa assembly inthlanah hian rorellai, chief minister Pramod Sawant kaihhruai BJP an che ṭha a, party mala seat la hnem ber an ni. Nimin tlai khan state khawpui Panaji-ah BJP legislature wing an inhmu khawm nghal a, group leader an thlang ang.

BJP hi party mala seat la hnem ber ni mah se party malin sorkarna an siam thei dawn lo a, independent MLA thlan tlin pathumten an thlawp dawn thung. Hei vang hian nimin tlai khan sorkar an siam theih thu hrilhin Governor Ps Shreedharan Pillai hmuh an tum tih an sawi.

State health minister leh BJP hruaitu, Vishwajit Rane chuan an party-in sorkarna siam leh dawn mah se, Pramos Sawant chu Chief Minister-ah dah chhunzawm a ni dawn em tih erawh an la chian loh thu a sawi.

Manipur
Assembly seat - 60
Vote thlak ni - February 28 leh March 5
Chief Minister - N.Biren Singh (BJP)

Manipur-ah pawh rorellai BJP an che ṭha chhunzawm leh hle. Chief minister N Biren Singh chu Heingang bialah vote 18,271 in a chak. BJP hi party mala sorkarna siam thei turin a chak a, hei vang hian ṭangrual sorkar a siam meka a thawhpui, National People's Party (NPP) chu sorkar tharah hian an thawhpui chhunzawm tawh dawn lo niin Singh chuan a sawi. Chief Minister tur pawh central lama an party hruaituten an ngaihtuah dawn tih a sawi bawk.

Punjab
Assembly seat - 117
Vote thlak ni - February 20
Chief Minister - Charanjit Singh Channi (INC)

Punjab-a Aam Aadmi Party (AAP) chu hneh taka thlan tlin an ni. Rorellai, Congress president Navjot Singh Sidhu chuan mipuite duhthlanna pawmin an chak loh a pawm thu a sawi a, Aam Aadmi Party (AAP) a lawmpui thu a sawi nghal bawk.

Arvind Kejriwal-a kaihhruai, AAP hi union territory, Delhi-ah rorellai a ni a, tun ṭum inthlana Punjab-ah hnehna an chan tak avangin a ṭum khatna atan state puitlingah sorkarna an siam ve thei dawn ta a ni.

Rorellai Congress party hi nikum lamah party chhungah buaina lian tak an neih avangin September thla khan chief minister pawh an thlak a ngaih phah a, inthlan a nih zui mai avangin party dinhmun pawh an siamṭha hman lo a ni. Chief minister Charanjit Singh Channi pawh bial pahnihah ding mah se a chak zo lo ve ve a ni.

AAP hian seat 92 zet lain an sang fal bik hle a, a hnaih bertu Congress party chuan seat 18 chiah an la pha a, inthlan hmasaa an seat lak kha 59 zetin an pha lo.

Uttar Pradesh
Assembly seat - 403
Vote thlak ni - February 10, February
14, February 20, February 23,Feburary 27, March 3, March 7
Chief Minister - Yogi Adityanath (BJP)

Uttar Pradesh-ah chief minister Yogi Adityanath kaihhruaina hnuaiah BJP an che ṭha leh hle a, kum 2017 assembly inthlan aiin an vote hmuh a tam zawk.

Adityanath hi kum 70 chhunga Uttar Pradesh Chief Minister ni tawh zinga term hmang tluan thei pathumna a nih dawn bakah, a zawna term hnih tling thei panga na a ni. Kum 70 chhungin UP hian chief minister 21 a nei hman a ni.

Akhilesh Yadav kaihhruai Samajwadi Party leh Rashtriya Lok Dal thawkdun pawhin inthlan hmasa aiin hma sawn mah se BJP an la el pha lo hle thung.

Uttarakhand
Assembly seat - 70
Vote thlak ni - February 14
Chief Minister - Pushkar Singh Dhami (BJP)

Uttarakhand-ah pawh rorellai, BJP chuan sorkarna an siam leh dawn. Kum 2000-a Uttarakhand state a din aṭang khan rorellai party thlan tlin nawn an la awm ngai lo a, tun ṭumah a hmasa ber atan BJP chuan a zawnin thuneihna an chang thei dawn ta a ni.

BJP hi party mala sorkarna siam thei turin chak mah se, chief minister Puskhar Singh Dhami erawh a dinna bialah a chak zo lo thung. CM hian Khatima constituency-ah Congress candidate Bhuwan Chandra Kapri a hneh zo lo a ni. Congress hruaitu, chief minister hlui Harish Rawat chu a chak lo zo bawk.