MP BJP in an candidate hel 53 hnawtchhuak

Madhya Pradesh Assembly Inthlan neih turah Bharatiya Janata Party (BJP) chuan Nilaini khan an candidate hel 53 te chu an hnawtchhuak.

Madhya Pradesh inthlan neih tur atan hian Nilaini tlai dar thum khan nomination inhnuhdawh hun hnuhnung ber a ni a, BJP candidate hel te hi Nilaini thleng pawh khan an la inhnukdawk lo a ni. MP-a sorkarna siam mek BJP hian an candidate hel te hi kawng hrang hrang hmanga hneh let leh an tumin an bei a, mahse Nilaini tlaiah khan an hnawtchhuak leh ta zawk a ni.

Candidate hnawhchhuah zingah hian minister hlui Ramkrishna Kusmaria leh K L Agrawal, MLA hlui pathum leh Mayor hlui pawh an tel nghe nghe.

Hetihlai hian eptu party Congress pawhin seat 12-ah helna an tawk vek mek bawk a, MLA hlui Xavier Meda chu Nilaini khan an hnawtchhuak ve bawk a ni.

BJP hi finance minister Jayant Malaiyya-a seat luah Damoh seat chungchangah hian an buai hle nia sawi a ni a, Damoh seat tan hian Ramkrishna Kusmaria chuan nomination a file a ni.

Madhya Pradesh hi November 28 hian an inthlang dawn a, constituency 230 a awm a ni. December 11-ah vote chhiarna neih a ni ang a, December 13-ah chuan inthlang chungchanga buaipui ngai zawng zawng hi buaipui fel tawh tur a ni thung ang.