SC-in Sabrimala temple chungchanga thupek thlak duh lo

Supreme Court chuan Kerala-a Sabarimala temple-a hmeichhia, kum 10-50 inkarte luh khapna thupek a hlihsak chungchang thlak tura ngenna chu a ngaihtuah duh lo a, nakkum January 22-a ngaihtuah ṭhat turin a dah.

Chief Justice of India Rajan Gogoi chuan September 28-a thupek tihchhuah, Sabarimal temple-a hmeichhia tupawh luh a remtihna khingleta petition thehlutte hnenah January 22 thleng an nghah a ngai tih a hrilh a ni.

Supreme Court-in Lord Ayyappa temple-a kum za chuang zet hmeichhia kum 10-50 inkar luh khapna dan a hlih avangin hian Lord Ayyappa zuitute an lungawi lo hle a, khapna dan hlih a nih hnua temple hawn a nih pawhi hmeichhia lut tur dang turin mi tam tak temple bulah an pungkhawm a ni. State chhung hmun hrang hranga court thupek duh loha nawrh huaihawtnaah police-ten mi 3,700 chuang an man a ni.

Hemi anih avang hian Kerala Chief Minister Vijayan chuan Thawhlehni khan all-party meeting a ko a, hetah hian Congress leh BJP aiawh te pawh an kal a, heng party lian pahnih pawh hian SC thupek hi an dodal ve bawk a, ennawn leh an phut tih an sawi.

SC thupek hi Congress leh BJP bakah Hindu pawl hrang hrang te chuan an dodal nasa hle a ni.