Mamata-i'n hming thlak rawtna tihkhawtlai sakah puh

West Bengal Chief Minister Mamata Banerjee-i chuan Prime Minister Narendra Modi-a kaihhruai sorkarin khawpui hming a thlak reng laiin, West Bengal state hming 'Bangla' tia thlak an rawtna erawh a remtih pui thei lo niin a sawi.

CM Banerjee-i chuan a Facebook-ah BJP chuan politics lama an hlawkpui theihna tur remchang zawngin hmanlai hmun hming leh institution hming te chu a thlak reng a ni, a ti. "India in zalenna a hmuh hnuah state leh khawpui ṭhenkhat hming chu an state mipui rilru leh tualchhung ṭawng milin thlak an ni a, Orissa chu Odishan, Pondicherry chu Puducherry, Madras chu Chennai, Bombai chu Mumbai leh Bangalore chu Bengaluru tia thlak an ni. Mahse Bengal chungchangah chuan sorkar laipui rilru chu a dang let tlat si a ni", a ti.

State assembly chuan tualchhung mipuite duh dan angin West Bengal state hming thlakna tur resolution chu lungrual takin a pawm tawh a, mahse hei hi tun thlengin home ministry chuan la pawmpui duh loin a la tihkhawtlai sak reng niin a sawi.