TN-ah Cylcone Gaja tleh vangin mi 11 thi

Tamil Nadu tuipui kamah thlipui cyclone Gaja a tleh a, thlipui tlehin chhiatna a thlenah mi 11 an thi a, mi eng emaw zatin hliam an tuar. Tuipui kam district paruka cheng mi 76,390 chu hmun him lamah sawnchhuah an ni bawk.

Thlipui hi darkar khata mel 120-a naa tlehin nimin zing khan Nagapattinam leh Vedaranniyam te a nuai a ni.

Tamil Nadu State Disaster Mangament Authority chuan hmun hniam lama chengte chu sawnchhuah niin, heng mite hi district paruk-a relief centre 300 chuangah dah an ni tih a sawi. Hei bakah hian thlipui a thlen hma hian Nagapattinam leh coastal region eng emaw zatah electric suply tihtawp a ni bawk.

Thlipui tuarte ṭanpui leh chhawmdawl tur hian National Disaster Response Force team chu tirh nghal an ni a, state disaster management authority chuan thlipui tleh laia mipuite fimkhurna tura hriattirna pawh an tichhuak nghal bawk.

Chief Minister K Palaniswami chuan thlipui tuarte chhawmdawl hna hi thawh ṭan nghal a ni tih sawiin, thlipui tuara thi chhungte chu zángnadawmna cheng nuai 10 ṭheuh, Chief Minister's Public Relief Fund (CMPRF) aṭanga pek an nih tur thu a puang. Hliam tuar na zualte chu cheng nuai khat ṭheuh pein, a na vak lote chu Rs 25,000 pek an ni dawn tih a sawi. Thlipuiin thil a tihchhiatte pawh enfiah nghal mek a ni, a ti.

Union Home Minister Rajnath Singh pawhin TN CM hi telephone-a biain, thlipui tleh vanga an state-in harsatna a tawhah sorkar laipui chuan a theih ang anga puih a tiam tih a hrilh.