AP-in CBI official-te an state-ah luh khap

Andhra Pradesh sorkar chuan Central Bureau of Investigation (CBI) mi leh sate chu an state chhunga hna thawk tura an lut dawn anih pawhin state sorkar hnen ṭangin phalna an lak hmasa zel a ngai dawn tih a sawi.

State sorkar chuan hriattrirna tichhuakin, an remtihna tel loin central investigating agency-te chuan hna an thawh a remti dawn lo tih a sawi a ni. Hemi rual hian Delhi Special Police Establishment thawhpui remtihna alo pek tawh pawh sut a nih thu a tarlang. CBI hi Delhi Special Police Establishment Act of 1946 hnuaiah din a ni.

CBI hian state sorkar hnen aṭanga phalna a neih loh chuan AP state chhungah eng thubuaiah pawh a inrawlh thei tawh dawn lo a ni. State sorkar chuan tunhnaia CBI official-te thil dik lo tihnaa inhnamhnawiha an inpuh kual chungchangah he agency-ah hian rinna an nghat ngam tawh lo tih a sawi.

State sorkarin CBI khuahkhirhna a siam tak avang hian AP state chhunga central sorkar department leh institution awmte dap leh chhui chian ngai an nih pawhin AP-a Anti-Corruption Bureay (ACB) hian hma a la thung tawh dawn a ni.

Andhra Pradesh Chief Minister Chandrababu Naidu kaihhruai Telugu Desam Party (TDP) chuan kum tir lam khan central-a BJP kaihhruai NDA sorkar an thlawpna an lo hnukdawk tawh a, Naidu hian kum 2019 inthlanpui neih tura eptu ṭangrual pawl siam tumin hma a la mek. Naidu chuan BJP leh YSR Congress te chu a kaihhruai sorkar hnathawk thei loa siam tuma phiarruah a puh bawk.

BJP kaihhruai sorkar laipui chuan central institution, CBI leh IT department te pawh an thunun vek a, Andhra Pradesh tana special status pek an phut avangin sorkar leh minister te vauna atan hian heng institution hmang hian an vau niin a sawi.