JD(U) minister hlui Manju Verma hnawtchhuak

Janata Dal (United) chuan Bihar-a Muzaffarpur shelter home-a hmeichhe naupang pawngsualna thleng kaihhnawihah Central Bureau of Investigation (CBI) in a in an dapsak, Bihar minister hlui Manju Verma-i chu an party aṭangin an hnawtchhuak.

Minister hlui Verma-i hi arms act hnuaia manna tur thupek tihchhuah a ni tawh a, mahse tun thlengin chin hriat lohin a la bibo a ni.

JD(U) state president Vashishta Narayan Singh chuan an party chuan pawikhawihtu leh eirute ngaihnathiamna an neih loh tur thu an lo sawi tawh angin, November 10 aṭang khan Manju-i hi party member a nihna aṭangin an hnawtchhuak tih a sawi. Eng mi pawh ni se, party member pawikhawihna leh eiruknaa inhnamhnawihte chungah action an la zel dawn tih Singh chuan a sawi.

Verma-i hi Muzzafarpur shelter home-a pawngsualna thleng chungchanga mawhphurtu bera puh, Brjesh Thakur chu a pasal Chandrasekhar Verma nen inzawmna ṭha tak anni tih media report tihchhuah a nih hnuin August thlaah social welfare minister a nihna aṭangin a bang a ni. A hnuah CBI chuan Patna-a a chenna in an dap a, he hmunah hian silai mu eng emaw zat man tel a ni a, hei vang hian arms act hnuaiah thubuai siamsak zui a ni.

Thubuai siamsak a nih hnuah Verma-i hian Begusari court-ah anticipatory bail a dil a, mahse a dilna hi hnawlsak a ni. A pasal Chandrasekhar Verma hi October 29 khan court-ah a inpe a ni.

Vermna-i manna tur thupek tihchhuah a nih hnuah a awmna chin hriat loha a bibo zui avangin police-te chuan man tumin Bihar leh Jharkhand-ah hmun hrang hrang an dap tawh bawk.