PM-in Gujarat-ah Roadshow a nei

State panga assembly inthlan neih takah BJP-in hnehna ropui tak an chan hnuah, nimin khan prime minister Narendra Modi chuan inthlan neihna tur , Gujarat-ah road show ropui tak a nei.

Prime Minister hian ni hnih cham turin nimin khan a home state hi a tlawh a, Kamalam airport aṭanga Gandhinagar-a BJP state headquarter, km 10 vela thuiah roadshow hi a nei zui nghal a ni. Jeep-ah chuangin, PM Modi hi Gujarat chief minister Bhupendra Patel leh state BJP president CR Patil-ten an ṭawiawm a ni.

Modi hian nimin vek khan Memnagar-a GMDC Ground-ah ‘Gujarat Panchayat Maha Sammelan’ a hmanpui a, vawiin hian Navrangpura-a Sardar Patel Stadium-ah ‘Khel Mahakumbh 2022’ a hmanpui leh bawk ang.

Gujarat assembly inthlan hi kumin kumtawp lamah neih a ni ang. Gujarat bakah Himachal Pradesh-ah pawh kumin hian inthlan neih a ni dawn bawk.

Assembly inthlan result-a BJP-in state palia hnehna an chan hnua thu a sawiah, PM Modi an party-in hnehna ropui tak an chan chu mipuiten miretheite hmakhua ngaitu sorkar leh inrelbawlna ṭha an kalpui an thlawpzia a tilang chiang hle a ni, tiin a sawi. Kum 2024-a Lok Sabha inthlanpui neih turah pawh heng state palia an party chetṭhatna chuan hnehna an chang leh ngei dawn tih a lantir niin a sawi bawk. Manipur leh Uttar Pradesh-ah assembly inthlan hmasa aiin an chet ṭhat zawk thu leh, Goa-ah pawh party malin sorkarna siam pha lo mah se inthlan hmasa aia an vote hmuh zat a tam zawk thu a sawi.

BJP-in an dinhmun sawhnghet zel
State panga - Goa, Manipur, Punjab, Uttar Pradesh leh Uttarakhand assembly inthlan neihah, BJP hi state paliah seat la hnem ber niin; Manipur, Uttar Pradesh leh Uttarakhand-ah party malin sorkarna an siam thei dawn a, Goa-ah independent MLA-te thlawpnain BJP kaihhruai sorkar a ding dawn bawk.

Manipur-ah BJP hian assembly seat 60 awmah seat 32 lain,simple majority a nei pha. Uttar Pradesh-ah assembly seat 403 zinga seat 255-ah hnehna changin, sorkarna siam tura member neih ngai zat 202 chu member 53 zetin an khum. Uttarakhand-ah pawh BJP hian assembly seat 70 awmah seat 47-ah hnehna a chang a, an state chanchin kum 21 chhung a ṭum khatna turin BJP hian a zawnin term hnih sorkarna an siam dawn ta a ni. Goa-ah erawh seat 40 zinga 20 lain, sorkarna siam tura member ngai zat chu pakhatin an pha lo a, mahse independent MLA pathumten BJP hi an thlawp dawn vangin a zawnin a term thumna atan BJP sorkar a ding leh dawn bawk.

Uttar Pradesh chief minister Yogi Adityanath hi assembly inthlana a chuh vawi khatna niin, Gorakhpur Urban bialah a khingpui, Samajwadi Party candidate Subhawati Upendra Dutt Shukla chu vote 1,03,390-in a hneh a ni.

Punjab-ah erawh Aam Aadmi Party (AAP) thlipui a tleh a, assembly seat 117 awmah seat 92-ah hnehna an chang. Sorkarna siam tura member neih ngai zat hi 59 a ni. Punjab-ah hian BJP chuan seat hnih chauh a la pha thung a, rorellai Congress party chuan seat 18 a la ve bawk.