President thar thlan turah BJP tan kawng a awlsam

Central-a rorellai, BJP chu state pali assembly inthlanah an chet ṭhat avangin kumin July thlaa India President thar thlanna neih turah, an party candidate chu thlan tlinna tur member an ngah tawk dawn ta.

BJP kaihhruai National Democratic Alliance (NDA) hian Rajya Sabha-ah majority nei pha lo mah se, Lok Sabha leh assembly 17-ah majority a nei thung a, heng zingah hian assembly lian ber Uttar Pradesh pawh a tel.

President hi electoral college, Parliament in hnih member leh state leh UT-a assembly member-ten an thlang ṭhin a ni. State zingah hian UP vote value hi a sang ber, BJP-in majority an neih chhunzawm leh tak avangin an party-in President candidate a ruat tan kawng a awlsam tawh dawn hle a ni.

Kuminah Rajya Sabha seat 75-ah member term tawpin inthlan buatsaih a ngai dawn a, heng zinga seat 73-ah chuan President thlanna neih hmain inthlan hi neih a ni ang. Hengah hian NDA hi an chet ṭhat chhoh leh a rinawm a, hei vang hian nakkumah chuan Parliament upper house-ah pawh NDA hian majority a neih theih tawh rin a ni bawk.

Hetih lai hian Upper House-ah Aam Aadmi Party (AAP) an rawn lian chho dawn bawk a, Punjab assembly-ah majority an neih tak avangin kuminah Punjab aṭangin AAP hian Rajya Sabha member paruk a nei thei dawn a ni. Rajya Sabha-a an member neih hi pathum aṭangin pakua-ah a pung chho ang a, House-ah party lian panga a ni phak tawh dawn a ni.