AAP-in national party nih tumin hma lam pan

Arvind Kejriwal-a kaihhruai, Aam Aadmi Party (AAP) chuan national party nih tuma an beihnaah hma an sawn zel.

AAP hian national party nih tuma an beih thu hi an zep lo a, tun ṭum inthlana Punjab-a hnehna ropui tak an chan avangin an thil tum tihlawhtling turin hma an sawn zel a ni.

National party ni tur hian a tlem berah state pathum aṭang talin Lok Sabha-ah seat 2% an neih phak a ngai a; hemi bakah hian state pali chinah tal Legislative Assembly inthlanah vote tla aṭanga 6% an hmuh phak a, state pali-in state party-a pawm phawt an ngai ang.

India ramah recognized national party hi pasarih awm mekin chungte chu - All India Trinamool Congress, Bahujan Samaj Party, Bharatiya Janata Party, Communist Party of India, Communist Party of India (Marxist), Indian National Congress leh Nationalist Congress Party-te an ni.

AAP hian Delhi-ah sorkarna siam mekin, Punjab-ah sorkar an siam leh dawn bawk a, Goa-ah seat hnih lain vote share 6% an hmu pha bawk a ni. AAP convener Kejriwal chuan kumina assembly inthlan la neih lehna tur, Himachal Pradesh leh Gujarat-ah pawh AAP hian chuh an tum thu a lo sawi tawh bawk.