Security chungchangah PM-in high-level meeting ko

Prime minister Narendra Modi chuan nimin khan India ram security dinhmun thlirin high level meeting a ko a, he hunah hian Ukraine rama indona thleng mek chungchangte pawh sawiho a ni bawk.

Meeting-ah hian defence minister Rajnath Singh, finance minister Nirmala Sitharaman, external affairs minister S Jaishankar, NSA Ajit Doval leh senior official dangte an tel. Army, Navy leh Air Force hotute pawh an tel bawk. Border area-a security dinhmun te, boruak leh tuipui lama venhimna kalpui a nih dante chu Prime Minister hi hrilh a ni.

Defence sector lamah India chu a intodelh theihna tura theihtawp chhuah a ṭul thu Prime Minister chuan a sawi a, hei hi security lam thuam chakna tur chauh ni loin economy ṭhanna lam thlengin a pui dawn a ni, a ti.

PM hian state panga inthlan result puana BJP-in hnehna an chan hnua party worker-te hmaa thu a sawiah, India chuan Russia leh Ukraine chu inzawmna ṭha tak neihpui a mamawh ve ve tih a sawi a, hemi rual hian ram pahnihte indona thleng mek chungchangah India chuan boruak muanawm a awm thuai a beisei thu leh, inbiakna hmanga an buainate pawh chinfel theih a beisei thu a sawi.

Russia-in Ukraine a run hnuah Ukraine rama India mi awm 20,000 vel chu sorkarin 'Operation Ganga' a kalpui hmangin a hruaichhuak tawh a ni. PM chuan Kharkhiv khawpui beihnaa India mi thi, Naveen Shekarappa ruang chu India rama hawnpui a nih ngei theihna tura a ṭul anga hma la turin meeting-ah hian a hrilh.

PM Modi hian India mite hruaichhuah an nih hma hian Russia president Vladimir Putin leh Ukraine president Volodymyr Zelenskyy pawh phone hmangin a lo be tawh bawk a ni. Ukraine aṭanga India mite him taka hruaichhuah chu sorkarin a ngaih pawimawh ber a ni tih sawiin, PM hian a hma pawhin hemi chungchang ngaihtuah hian meeting ṭum eng emaw zat a lo ko tawh a ni.