Kejriwal leh Bhagwant Mann-ten Mega Roadshow nei

Punjab assembly inthlan neih zawh takah Aam Aadmi Party (AAP) in hnehna ropui tak an chah hnuah, nimin khan AAP convenor Arvind Kejriwal leh Punjab chief minister thar tur Bhagwant Mann-te chuan an hnehna lawmin Amritsar-ah roadshow ropui tak an nei.

Roadshow neih hma hian hruaitu pahnihte hian Golden Temple an tlawh hmasa phawt a ni.

Seat 117 awmna Punjab assembly-ah hian AAP hian seat 92 an la a ni. Bhagwant Mann hi Dhuri bialah MLA atan thlan tlin niin,amah hnaih bertu chu vote 58,000 chuangin a hneh a ni. Kar liam ta Zirtawpni khan party MLA thlan tharte chuan AAP legislature party leader atan an thlang a, Inrinni khan Govenor Banwarilal Purohit hmuin sorkar an siam theih thu hi a hrilh nghal a ni.

Delhi-a rorellai, AAP hian Punjab hi state puitlinga sorkarna an siamna hmasa ber tur a ni. Punjab inthlanah hian beisei phak bakin an che ṭha a ni. Hnehna ropui tak an chan hnuah, kumin assembly inthlan neih lehna tur Himachal Pradesh-ah hnehna chan leh ngei tumin an chuh leh dawn tih Inrinni khan an puang nghal bawk.

Kum 48 mi, comedian-turned-politician, Bhagwant Mann hi March 16-ah Punjab chief minister thar atan lakluh a ni dawn a, a cabinet member-te erawh chu a hnuah lakluh an ni thung ang. CM thar lakluh inkhawm hi freedom fighter, Bhagat Singh-a khua, Khatkar Kalan-ah neih a ni ang. He huna tel tur hian Punjab mipuite sawmin, "Punjabi zawng zawng chuan hemi ni hian Punjab hmasawnna turin kan theihtawpin kan inpe ang tiin kan tiam dawn a ni," a ti. CM thar lakluh inkhawma tel tur hian Arvind Kejriwal pawh sawm a ni.

Mann chuan an party hruaitute chu an constituency-ah hun tam zawk hmang tur leh, cabinet seat inchuh lo turin a chah nghal. "Vote zawnga kan kalna hmunahte khan an tan hna thawk turin kan kal leh ngei tur a ni. MLA zawng zawngte chu khawpuiah awm ringawt loin, thlan tlin an nihna bialah an hun tam zawk hmangin, hna an thawk tur a ni," a ti.